Besøksmål

Kyrkja på Ænes

ÆNES KYRKJE

Er Kvinnherad si minste og eldste steinkyrkje, og er bygd

på Håkon Håkonson si tid, rundt år 1190 - 1200.

Klokketårnet vart bygd på kyrkja så seint som i 1869.

Kyrkja er berre 16,3 m lang, og har vegger som er ein

og ein halv meter tjukke, men den har likevel 120 sitjeplassar.

Den ligg vakkert til på Ænes og er omkransa av Ænesdalen,

Gygrastol og Hardangerfjorden.

For omvisning - ta kontakt med Soknerådet, tlf. 53 48 45 43

Furebergfossen er like flott uansett ver og årstid

FUREBERGFOSSEN

To kilometer innanfor Ænes mot Sundal, ved Fv.551 ligg ein av

landets flottaste fossefall. Her kjem vatn frå Folgefonna

stupande over kanten og rett i fjorden.

Mange likar å stoppa her for å foreviga det brusande synet,

og det er ikkje få filmrullar denne fossen har blitt festa til.

Fossen er og eit flott skue frå fjorden.

Ved flaum og store nedbørsmengder hender det at brua over

er stengd.

Bondhusbreen

BONDHUSBREEN

Bondhusbreen høyrer til dei aller første turistattraksjonane

i Noreg, og er i dag ein av dei største turistmagnetane i

Kvinnherad og på Vestlandet.

Kvart år valfartar tusenvis av turistar innover Bondhusdalen

for å sjå den vakre dalen, Bondhusvatnet og breen.

Frå Sundal og inn til Bondhusvatnet er det fin grusveg å gå

på, og turen tek 45 min. Vidare inn til breen er det sti, og ein

reknar ein times gange frå vatnet.

To forhold er viktige for at ein bre skal verta danna. Desse er

vinternedbør og sommartemperatur. For at det skal bli ein bre

må nedbøren om vinteren vera større enn smeltinga om sommaren.

På Folgefonna kjem det c.a 5000mm nedbør i året, det tilsvarar

oppimot 10 meter snø. Tyngda av denne snøen pressar

isen ned i dalane.

Hovedfasaden på gjestgiveriet

SUNDAL GAMLE GJESTGIVERI

Hotelldrifta i Sundal vart grunnlagt av Erik G. Gausvik i 1889. Krambu  i

sjøhuset på kaien hadde han drive sidan 1876. Då var turiststraumen

på topp, og det var stor trong for ein gjestgjevarstad og handel.

Sidan den tid og fram til slutten av 1990 talet var gjestgiveriet

i dagleg drift. No er gjestgiveriet berre brukt til privat bustad av

bornebornet til Erik G.Gausvik. 

Bygget er i sveitsarstil, med ein del flotte utskjeringar, og ikkje heilt ulik

andre kjende gamle hotel på Vestlandet.

Gjesteboka fortel at både lordar og brevandrarar fekk ei god seng her.

Å snakk om frukosten - kaffi frå sølvkanne, potetkaker og nyrørt

bringebærsyltetøy.. Det er ikkje ope for omvisning, men verd å ta

i augnesyn på utsida.

Glasmåleri på stabbursveggen

GJERDETUNET MUSEUM

Like ved riksvegen i Austrepollen ligg Gjerdetunet som er ein

samling gamle gardsbygningar med røykstove og stabbur.

Dei gamle bygningane har tradisjonelt innbu, og stabburet er

ei målabu frå 1588 med eit gamalt glasmåleri frå tidleg 1600 talet.

Tunet har mykje historie knytta rundt bjørnejakt, og ein av dei mest

vidgjetne skyttarane var Godtskalk Person Gjerde. Det vert opplyst

at han og faren skaut over 60 bjørn, og at skallane etter desse bjørnane

lenge fanst på tunet. Nokre av børsene finst der framleis.

For omvisning ta kontakt med Sunnhordland Museum

tlf. 53 41 38 99  epost: felles@sunnhordland.museum.no

(Foto:© T.Slettebakken/E.Sundal)